....gatumpok kami sa radyo hay mamati tamun ka Toyang Ermitanya !
Namuklat ako sa kalibutan nga waay pa't kuryenti sa amun.
Paltera pa'y nagpabata kay Nanay sa balay nanday Lolo Coroy sa uma.
Tiempo ni Marcos - tawag kanamun mga Martial Law Babies.
Sa tiempo nga to, delicado kon maggwa ka nga gab-i. Indi ka gani pwede maggamit ka flashlight, sulo gid hay basi matapangan kaw nga Army.
Hay ga-obra si Nanay sa Iloilo, si Lola kag Lolo lang imaw namon sa balay.
Dumduman ko, pagsirum ka kalibutan, napang pugo dun kami ni Lola Elac hay orasyon dun, tuya pa tamun sa uhut ga tumbling-tumbling .
Ay apaw! dokaron mag agi ako sa taramnan daw indi ko ma imagine, gabasyahanay tamun ka uhut nga tama ka giruk. Ay pwerti nga pangaraykayanay imo pag tag-uruli dun.
Ah ti kun waay it baknutanay hay mga duray, manibin dun kami kag mag pajama hay maihapon dun burubhay.
Sige day-a ya digamo ni Lola, waay man da it patay-patay ya radyo na sa tupad .
Waay it maktandug kaday-ang radyo na hay paraayunan nga daan.. Indi mag andar kun indi pagpalpagun! He he ..
Sige sugnod na kada ka kahoy sa dabok na sa tinig-ang na, amu ma'y dasuk namun sa iruk na, hay nahadlok kami ka napamatian na nga Mundo Mestico.
Ay, sa kakurulba gid , kapin pa kun mahangin kag mapatay ya kingke namun nga suga, nagakuruyampad kami kag mag dinasukanay kag mag urahab hay tama gid ka dulum.
Pagtapos ihapon,mamarungkot dun kami ka habol kaday-a hay sige man angud pamati sa radyo na.
Sobra pa gid tana ka kaharadlukan ya Ang Itom nga Libro. Ay, abaw, daw madaramguhanon timo.
Amo da nga gapangadi gid kami anay antes magturog pagtapos ka itikay kag tikal sa baratangan.
Pagpanukturuok ka manok sa kaagahon batyagan ko kada si Lolo mahimos dun da pa taramman. Aga pa dang mal-am malukso kag mag obra sa balud. Burubhay, batyagan ko duman kada si Lola ga birik ka radyo na hay mamati dun kay Nuring Espanola parte sa mga tips sa panguma kag panimalay . Sige pa da amung turog kag burubaliswa asta magsanag gid kag magbalita dun sa radyo.
Pagbugtaw, mamubod kami ka manok ka libayun ko. Duro pis-anan ni Lola Elac pay!
Ga irinagaw lang da kun manguruting kami; gadaralagan dayun kag magpararapit. Kon mag-ihaw si Lola mahapos lang magdakup haw mga mahagop.
Pag-uruadlawon dun,mamahaw kami, dungan day-a sa Bombohanay Big time.
Pirme dapli namon kon indi itlog, kusahos nga ginabitay sa tarap-anan.
Kon maka-uli si Lolo halin sa taramnan, kis-a may dara day-a nga Taiwan indi gani taroy nga nasikup na sa buhangan. Pagkatapos pamahaw tinluan na day-a kag laktan ka ugbos ka bayabas para sa igma. Naputos na pa da sa dahon ka Cacao - mahamut-hamut.
Sige duman da ay Lola nga pamati ka Sin-o ang May Sala sa radyo na.
Kun mainit init, makita mo day-a ya daan na nga mga battery nabulad na sa init.
Ibulos na da sa nagamit nasa radyo na kon magluya dun.
Gasagarat ya tunog ka bateri nga bag -ong napa initan daw!
Ti burubhay, tag irigma dun, nabuligan namon si Lola ka pamili ka takway indi gani alugbati nga tulahon na.
Lain Sya sa Iban duman kada napamatian na .
Kis a, kataraka man ya laswa, na prituhan kami ni Lola ka binuro na nga baboy sa garapon..
He he daw utut ana baho pay manami man kun ilakot sa monggo .
Maramig ramig man ya tubig namon hay sa banga ya irimnan..
Hmm may pitik-pitik man kis a eh, daw amu man sa langgaw nga tuba,, pay amu gid man da tana kuno, amo da gapa aslum.
Maturog-turog kami pagtapos igma. Kuno abi lang gabasa basa ka komiks pay kon maturugan si Lola, gapalagyo kami kag mag taksi sa tupad balay. Tansan man lang ya patad, pay tama gid kasadya magkayaba sa yab ok kag mag binaisay kon sin-o ya dayaon.
Sige hampang namon, batian ko kada ya mga laygay ni Tyay Evelyn sa radyo ka pihak balay. Matulin andang pamati sa atang-atangan sige hingutwanay kag tsismis kon sin-o duman ya nagbusong kag gin-ulian ka bayi.
Burubhay, Dear Diary dun, gawawaw dun kada si Lola ka panawag hay nakabugtaw dun kag waay dun kami, waay tana kamaan, tuya tamon sa puno ka kawayan imaw ka mga migo namun sa pihak balay,gatumpok kami sa radyo hay mamati tamun ka Toyang Ermitanya ! Masadya gid pamatian dya ang suyaay ni Albina kag ni Boklan , may paaman pa nga , medyo binastos nga indi man gali ,sa pamatin-an lang ni Ati.
Pagtapos kaday-a, mahuyab kami pa suba, manamang kon may tiempo na, mangali ka kamote nga indi't amon, mang-luak ka mais nga surugbahon , ukon manggalbot ka mani ni Lolosa balud.. amun man ah.
Kon manabaw ya suba, matabok mai.. Sa sulugan lang kami ga agi . Kis a duro agihis kon masinaw. Hala, pamudyot duman kami kada. Nami paluadon sa gab i kag sanlagon sa aga .Yum yum!
Kon waay, ti mang kulitis kami sa tabok agud may dara kami kay Lola. Kon duro lupo ti lupo eh, kon may tangkong man kag tino-tino ti amo dulang to'y bagtungon namon pauli..
Contest kami kada-a dayon ka dalagan pabalik kay Lola kag ipadayaw ya dara namon agud malipat ka arakigon na nga nagsaliputpot kami palagyo waay mag piyung-piyong..Galipat gid man!
Ti tugtan na dum kami kada magdayan liwat asta makalab-ot duman kami sa taramnan kag mag hampang liwat sa uhut asta magsirum..kag manguruykoy.. He he .
Uhu!, naka ignot ako. Napiyungan gali takun sa taxi nga nasakyan namon. Nadamguhan ko lang gali ya mga masadya nga mga inagyan namon kadang gagmay pa kami.
Abaw!.. Provincial Jail pa ya ga andar sa radyo ka taxi ha. Asta dokaron may Toyang pa kag Provincian Jail .
Gapamati man tana ya drayber ka taxi nga siguro gurang-gurang pa kanakon, kag mag talangkaw sa nabatian na.
Magahod, gabina-isay ya tatlo ko ka mga bata sa likod. Gatikalay ka level da sa LOL kag mga cheats da sa GTA , amo man ugtas ka Nanay nanda.
No comments:
Post a Comment